Монгол Улсын гаармгай мэргэн Б.Наранхүү
Дорнын уудам говийн баруун хязгаар Мандан бадрахын ашдын билэг ерөөлтэй Мандах нутгаас үндэсний шагайн харвааны спортод богинохон хугацаанд өндөр амжилтыг үзүүлсэн анхдагч амжилтын эзэд бол харваачид дундаа “Баадай” хэмээн хүндлэгдсэн Монгол улсын Хүндэт харваач, аймгийн Гоц мэргэн Ёндонгийн Баатарсүрэн агсны хүү нар юм. Тодруулбал өөрийн амьдарлынхаа дийлэнх цаг хугацааг үндэсний спорт тэр дундаа шагайн харваанд зориулсан түүний 3 хүү нь гурвуулаа харваач. Дунд хүү Б.Наранбаатар МУ-ын Дархан мэргэн, том хүү Б.Наранхүү МУ-ын Гарамгай мэргэн гээд Мандах нутгаасаа анхны улсын цолыг хамтдаа хүртээд зогсохгүй алдар, амжилт нь улам нэмэгдэж яваа орчин цагийн Монголын шагайн харвааны идэр мэргэчүүд. Хоёрхон жилийн хугацаанд аймгийн гоц мэргэнээс Улсын Дархан, Гарамгай мэргэчүүд болсон түүхэн амжилт тэднийх. Түүгээр зогсохгүй бага дүү аймгийн Арслан Б.Баатархүү залуу харваач, авга ах нар аймгийн Хурц Арслан Ё.Эрдэнэжаргал, Хүндэт харваач Ё.Бат-Эрдэнэ гээд Цэргийн заан Шаравчогдонгийн Ёндонгийн удмынхан Үндэсний спорттой салшгүй холбоотой. Тиймээс ч аавынхаа хүслийг гүйцээж алдар, цуугаа зарлуулан дуудуулж улсын том цолтонгууд болжээ.
